ஒரு ஊமையின் ராகம்                                                                                                                                     

                                                                                         பி.  கிருஷ்ணமூர்த்தி

ஊர் எல்லாம் அவன் பெயர்                           

ஊமை தம்பி என்பது

அண்ணன் இல்லா தம்பி அவன்    
அண்ணனாக கைகொடுப்பான்                              

ஊர்கோடியில் அவன் குடிசை

ஊமைக்கோ இசையில் ஆசை

வாய் பேசா வரம் பெற்றும்

காது கேளா நிலையிருந்தும்

மானசீக மேடையில்

ராகங்களை ரசித்தவன்                                                              

சத்தங்கள் அவனுக்கு சங்கீதம்

 ராகங்கள் அவனுக்கு  சொந்தங்கள்

பொழுது விடியல் வேளைகளில்

பூபாளம் அவனுக்கு காத்திருக்கும்

காட்டுக் கருங்குயில் கூவுதலில்

காம்போதி அவனுக்கு எதிரொலிக்கும்

மேகம் சிந்தும் மழைச்சாரலில்

மோகனத்தை அவன் ரசித்தான்

ஓர் இரவு

  

காட்டுத் தீ குடிசையை எறிக்க

கருகி விழுந்தான் ஊமை தம்பி

முடிவுரை அவனுக்கு அறிமுகமானது

 முகாரி  ராகத்தில்

விலை மாது

விலை மாது என்ற பெயரில்

Courtesy:  Android Apps on Google Play

விலைக்கு எங்களை வாங்க முடியாது

வாடகைக்கு எங்களை தருகிறோம்

வாழ்க்கையில் சிதறிய முத்துக்கள்

காமதேவன் ஆளும் வரை

கட்டாயம் தேவை எங்களது சேவை

பத்தினி பட்டத்தை இழந்திருந்தாலும்

பாசத்திற்கு ஏங்கும் பாவ ஜன்மங்கள்

உலகம் தூங்கும் நேரம்

உல்லாசத்திற்கு உதவிகின்றோம்

வாடிக்கையாளர்கள் பலவிதம்

வழக்கமான கதைகளும் பலவிதம்

கூண்டில் துவளும் குயில்கள் நாங்கள்

கூவமுடியா ஊமைகள் ஆனோம்

குத்து விளக்காய் இருந்த நாங்கள்

சிவப்பு விளக்கில் அடிமைகள் ஆனோம்

ஆண்டவனை நாங்கள் வேண்டுவதெல்லாம்

அழியட்டும் எங்களுடன் இந்த தொழில்   

அணையட்டும் சிவப்பு விளக்கின் ஜோதி

எரியட்டும் குத்து விளக்கின் திரிகள் 

               - பி. கிருஷ்ணமூர்த்தி